1 Samuel 29
1ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲛⲛⲉⲩⲡⲁⲣⲉⲙⲃⲟⲗⲏ ⲉϩⲣⲁⲓ ⲉⲁⲫⲉⲕ ⲡⲓ︤ⲏ︦ⲗ︥ ⲇⲉ ⲁϥⲧⲁⲁϥ ⲉϩⲣⲁⲓ ⲉⲁⲉⲛⲇⲱⲣ ⲧⲉⲧϩⲙⲡⲕⲁϩ ⲙⲡⲓ︤ⲏ︦ⲗ︥ 2ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲛⲉⲩⲙⲟⲟϣⲉ ⲡⲉ ϣⲉ ϣⲉ ⲁⲩⲱ ⲛⲉⲩⲛⲁⲣϣⲟ ϣⲟ ⲇⲁⲩⲉⲓⲇ ⲇⲉ ⲙⲛ ⲛⲉϥⲣⲱⲙⲉ ⲛⲉⲩⲙⲟⲟϣⲉ ⲡⲉ ⲛϩⲁⲉ ⲙⲛ ⲁⲅⲭⲟⲩⲥ 3ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ϫⲉ ⲛⲓⲙ ⲛⲉ ⲛⲁⲓ ⲉⲧⲙⲟⲟϣⲉ ⲉⲧⲛⲏⲩ ⲛⲙⲙⲁⲛ ⲡⲉϫⲉⲁⲅⲭⲟⲩⲥ ⲛⲛⲉⲛⲟϭ ⲛⲛⲁⲗⲗⲟⲫⲩⲗⲟⲥ ϫⲉ ⲡⲁⲓ ⲡⲉ ⲇⲁⲩⲉⲓⲇ ⲡϩⲙϩⲁⲗ ⲛⲥⲁⲟⲩⲗ ⲡⲣⲣⲟ ⲙⲡⲓ︤ⲏ︦ⲗ︥ ⲉⲁϥϭⲱ ⲛⲙⲙⲁⲛ ϩⲛ ϩⲉⲛϩⲟⲟⲩ ⲧⲏⲣⲟⲩ ⲧⲙⲉϩⲣⲟⲙⲡⲉ ⲥⲛⲧⲉ ⲧⲉ ⲧⲁⲓ ⲁⲩⲱ ⲙⲡⲓϩⲉ ⲉϩⲱⲃ ⲉϩⲟⲩⲛ ⲉⲣⲟϥ ⲛϫⲓⲛ ⲉⲡⲉϩⲟⲟⲩ ⲛⲧⲁϥⲉⲓ ⲉⲃⲟⲗ ⲛⲁⲓ ϣⲁ ⲉϩⲟⲩⲛ ⲉⲡⲟⲟⲩ ⲛϩⲟⲟⲩ 4ⲁⲩⲱ ⲁⲩⲉⲙⲕⲁϩ ⲉⲧⲃⲏⲏⲧϥ ⲛϭⲓ ⲛⲛⲟϭ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ⲛⲁϥ ϫⲉ ⲕⲧⲟ ⲙⲡⲉⲓⲣⲱⲙⲉ ⲉⲡⲁϩⲟⲩ ⲁⲩⲱ ⲙⲁⲣⲉϥⲕⲧⲟϥ ⲛϥⲃⲱⲕ ⲉϩⲣⲁⲓ ⲉⲡⲉϥⲙⲁ ⲡⲙⲁ ⲛⲧⲁⲕⲕⲁⲁϥ ⲛϩⲏⲧϥ ⲛϥⲧⲙⲉⲓ ⲉⲃⲟⲗ ⲛⲙⲙⲁⲛ ⲉⲡⲡⲟⲗⲉⲙⲟⲥ ⲛϥⲧⲙϣⲱⲡⲉ ⲛⲉⲡⲓⲃⲟⲗⲟⲥ ⲏ ⲛⲕⲣⲟϥ ⲛⲧⲉⲙⲡⲁⲣⲉⲙⲃⲟⲗⲏ ⲉⲣⲉⲡⲁⲓ ⲅⲁⲣ ⲛⲁϣϩⲱⲧⲡ ⲉⲡⲉϥϫⲟⲉⲓⲥ ϩⲛ ⲟⲩ ⲉⲓⲙⲏⲧⲉ ϩⲛ ⲛⲁⲡⲏⲩⲉ ⲛⲛⲣⲱⲙⲉ ⲉⲧⲙⲙⲁⲩ 5ⲙⲏ ⲙⲡⲁⲓ ⲁⲛ ⲡⲉ ⲇⲁⲩⲉⲓⲇ ⲛⲧⲁⲩⲙⲟⲟϣⲉ ϩⲓϩⲏ ⲙⲙⲟϥ ⲛϭⲓ ⲛⲉⲧⲭⲟⲣⲉⲩⲉ ⲉⲩϫⲱ ⲙⲙⲟⲥ ϫⲉ ⲥⲁⲟⲩⲗ ⲁϥⲡⲁⲧⲁⲥⲥⲉ ϩⲛ ⲛⲉϥϣⲟ ⲇ︤ⲁ︦ⲇ︥ ϩⲱⲱϥ ϩⲛ ⲛⲉϥⲧⲃⲁ 6ⲁⲅⲭⲟⲩⲥ ⲇⲉ ⲁϥⲙⲟⲩⲧⲉ ⲉⲇⲁⲩⲉⲓⲇ ⲡⲉϫⲁϥ ⲛⲁϥ ϫⲉ ⲡϫⲟⲉⲓⲥ ⲟⲛϩ ϫⲉ ⲕⲥⲟⲩⲧⲱⲛ ⲛⲧⲟⲕ ⲁⲩⲱ ⲛⲧⲕ ⲟⲩⲁⲅⲁⲑⲟⲥ ⲛⲁϩⲣⲁⲓ ⲁⲩⲱ ⲧⲉⲕϩⲓⲏ ⲛⲃⲱⲕ ⲉⲃⲟⲗ ⲁⲩⲱ ⲧⲉⲕϩⲓⲏ ⲛⲓ ⲉϩⲟⲩⲛ ⲛⲉⲥⲛⲙⲙⲁⲓ ϩⲛ ⲧⲡⲁⲣⲉⲙⲃⲟⲗⲏ ⲁⲩⲱ ϫⲉ ⲙⲡⲓϩⲉ ⲉϩⲱⲃ ⲉϥϩⲟⲟⲩ ⲉϩⲟⲩⲛ ⲉⲣⲟⲕ ⲛϫⲓⲛ ⲡⲉϩⲟⲟⲩ ⲛⲧⲁⲕⲉⲓ ⲉϩⲟⲩⲛ ⲛⲁⲓ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ⲛⲥⲁⲧⲣⲁⲡⲏⲥ ⲇⲉ ⲛⲥⲉⲧⲏⲧ ⲛϩⲏⲧ ⲛⲙⲙⲁⲕ ⲁⲛ 7ⲧⲉⲛⲟⲩ ϭⲉ ⲕⲧⲟⲕ ⲛⲅⲃⲱⲕ ϩⲛ ⲟⲩⲉⲓⲣⲏⲛⲏ ⲛⲅⲧⲙⲉⲓⲣⲉ ⲛⲟⲩⲕⲁⲕⲓⲁ ⲛⲁϩⲣⲁⲩ ⲛⲛⲉⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ 8ⲡⲉϫⲉⲇⲁⲩⲉⲓⲇ ⲛⲁⲭⲟⲩⲥ ϫⲉ ⲟⲩ ⲡⲉ ⲡⲛⲟⲃⲉ ⲛⲧⲁⲓⲁⲁϥ ⲛⲁⲕ ⲁⲩⲱ ⲟⲩ ⲡⲉ ⲡϩⲱⲃ ⲛⲧⲁⲕϩⲉ ⲉⲣⲟϥ ⲉϩⲟⲩⲛ ⲉⲡⲉⲕϩⲙϩⲁⲗ ⲛϫⲓⲛ ⲡⲉϩⲟⲟⲩ ⲛⲧⲁⲓⲉⲓ ⲛⲁϩⲣⲁⲕ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ϫⲉ ⲛⲛⲁⲉⲓ ⲉⲃⲟⲗ ⲁⲛⲟⲕ ⲉⲙⲓϣⲉ ⲙⲛ ⲛⲉϫⲁϫⲉ ⲙⲡⲁϫⲟⲉⲓⲥ ⲡⲣⲣⲟ 9ⲁⲩⲱ ⲁⲅⲭⲟⲩⲥ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲇ︤ⲁ︦ⲇ︥ ϫⲉ ϯⲥⲟⲟⲩⲛ ϫⲉ ⲛⲧⲕ ⲟⲩⲁⲅⲁⲑⲟⲥ ⲛⲧⲟⲕ ⲛⲁϩⲣⲁⲓ ⲁⲗⲗⲁ ⲛⲛⲟϭ ⲛⲛⲁⲗⲗⲟⲫⲩⲗⲟⲥ ⲥⲉϫⲱ ⲙⲙⲟⲥ ϫⲉ ⲛⲛⲉϥⲉϣⲉⲓ ⲉⲃⲟⲗ ⲛⲙⲙⲁⲛ ⲉⲡⲡⲟⲗⲉⲙⲟⲥ 10ⲧⲉⲛⲟⲩ ϭⲉ ϣⲟⲣⲡⲕ ⲉϩⲧⲟⲟⲩⲉ ⲛⲧⲟⲕ ⲁⲩⲱ ⲛϩⲙϩⲁⲗ ⲙⲡⲉⲕϫⲟⲉⲓⲥ ⲛⲁⲓ ⲛⲧⲁⲩⲉⲓ ⲛⲙⲙⲁⲕ ⲛⲧⲉⲧⲛϣⲣⲡⲧⲏⲩⲧⲛ ⲛⲧⲉⲧⲛⲃⲱⲕ ⲉϩⲣⲁⲓ ⲉⲡⲉⲧⲛⲙⲁ ⲛⲧⲁⲓⲕⲁⲧⲏⲩⲧⲛ ⲛϩⲏⲧϥ ⲁⲩⲱ ⲙⲡⲉⲣⲧⲣⲉⲡⲉⲕϩⲏⲧ ⲙⲉⲉⲩⲉ ⲉⲩϣⲁϫⲉ ⲉϥϩⲟⲟⲩ ϫⲉ ⲛⲧⲕ ⲟⲩⲁⲅⲁⲑⲟⲥ ⲛⲧⲟⲕ ⲛⲁϩⲣⲁⲓ ϣⲣⲡⲧⲏⲩⲧⲛ ϭⲉ ⲉⲧⲉϩⲓⲏ ⲛⲥⲟⲟⲩⲧⲛ ⲛⲁϩⲣⲏⲧⲛ ⲛⲧⲉⲧⲛⲃⲱⲕ 11ⲁⲩⲱ ⲇ︤ⲁ︦ⲇ︥ ⲁϥϣⲟⲣⲡϥ ⲙⲛ ⲛⲉϥⲣⲱⲙⲉ ⲉⲃⲱⲕ ⲁⲩⲱ ⲉϩⲁⲣⲉϩ ⲉⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲛⲁⲗⲗⲟⲫⲩⲗⲟⲥ ⲇⲉ ⲁⲩⲃⲱⲕ ⲉϩⲣⲁⲓ ⲉⲡⲟⲗⲩⲙⲉⲓ ⲙⲛ ⲡⲓ︤ⲏ︦ⲗ︥
Copyright information for
CopSahBible2